應唔應該去建制書展？

標題稱某大書展 「建制」，因為近年嘅審查程度已經去到 #明張目膽 嘅地步，亂咁DQ出版社，大型書店霸晒所有靚位已經變得微不足道。如此千瘡百孔嘅書展，各個書業單位仍然甘之如飴，到底呢個現象係點樣形成？

本店開張四年，每逢建制書展舉行前後，生意都會異常淡靜，隔離舗店員問我點解，我話就好似你去完美食展，食飽晒出返嚟就唔會再去餐廳食飯。

呢個比喻其實唔係好貼切，就算你今日再飽，第二日都總要食嘢，但係當你書櫃塞滿晒喺書展買嘅書，你可能幾個月都唔會再買。

讀大學嗰陣曾經做過出版社書展臨時工，親身體驗過展覽期間龐大嘅消費力；N年後自己開書店，由於冇參加書展，就體驗到另一個極端───銷情極端慘淡，更慘嘅係租金雜費並唔會因此消失。

"If you can't beat them, join them."

連鎖書店、出版社、發行商，原本喺產業鏈不同位置嘅單位喺書展 #連成一線，形成一個超級黑洞，吸收全年大部分書籍銷量，好多出版社已經演化到只會喺書展出新書，減低滯銷風險。小型書店眼巴巴睇住新書出版冇得賣，之後再賣都已經係水尾，結果都係要跌入書展黑洞，執到幾多得幾多。久而久之，參與建制書展已經成為出版社及小型書店生存嘅必要條件。

我對建制書展好不滿，但係又有好多我支持嘅出版社同書店參展，咁，我應唔應該去？

如果我有恆常閱讀習慣，我係唔會提出呢個問題，因為我知道有其他方法支持，並且會身體力行。

如果我只會趁熱鬧買書，平時連邊度有書店都唔知，可能因為有獨立書店結業、出版社被打壓而心有不甘，呢種道德責任感其實係救唔到佢哋，只有你真心享受購買同閱讀一本書，香港書市先會多一分希望，去唔去建制書展其實並唔重要。

咁點樣先可以令自己享受閱讀？簡單嚟講就係保持好奇心，而呢種好奇心其實對你嘅工作以至身心健康都有幫助，係非常實用的，有機會喺之後嘅文章同大家分享。