人工智能的異化

本來喱個秋天檔期滿心期待沙丘2，可惜因為荷李活嘅罷工牽連，上映時間要到出年三月，對於科幻迷嘅我係有啲痛。

結果我就將喱份盼望寄托轉移到《A.I.創世者》，以人工智能做題材嘅電影已經不勝枚舉，今次嘅故事背景放喺四十幾年後嘅世界，美國洛杉磯受到一次核攻擊，之後就將矛頭指向人工智能所為，所以美國要全力韱滅所有人工智能，唯獨電影中被稱為 新亞洲嘅盟國仍然繼續研發，美國條氣好唔順就整架母艦喺人地國家上空盤旋，又 barcode laser 周圍掃，見到人地機地就導彈射炸人(聽落幾似911之後出征伊拉克)。

故事開頭都有啲場口會帶到啲問題探討，人工智能係咪有情感呀？佢地係 good boy 定 bad guy？都係嗰啲陳腔濫調嘅話題，除左真人同機械人之外，去到中段仿生人慢慢滲入劇情主軸，而成場仗美國人要擊殺新亞洲嘅秘密武器就係仿生人細路，仿生人又唔算完全機械人，雖然都係被製造出黎，但係以一個真人複製出黎。

而喱個仿生人細路西利喇，the chosen one 般的存在，我以為 stranger things 嘅 eleven 亂入，只要佢合埋眼雙手類似合十嘅手勢，就可以打橫行，所有機械電子設備要開就開要閂就閂，基本上帶住喱個細路係一定唔會卡關。

另外如果喜歡睇爆炸嘅話我十分推薦，五花八門嘅爆炸都有，導彈炸、自殺式炸、c4炸、深水炸，如果要將喱套戲歸類，佢係同明日戰記同組別，畫面特技係出色嘅。

人工智能對我最大嘅影響就係令到一眾嘅荷李活工作人罷工，沙丘2要推遲上畫。